Friday, January 5, 2018

चिदंबर रहस्य

चिदंबरमच्या देवळाच्या गाभाऱ्याचं सुवर्णछत
Source : Internet 
चिदंबरमच्या देवळाच्या गाभाऱ्यात मूर्ती नाही असं वाचलंय. तिथे म्हणे फक्त पोकळी आहे आणि शिवपार्वती तिथे गुप्तरुपाने वास करतात अशी मान्यता आहे. गाभाऱ्यावर पडदा आहे. पुजारी पडदा दूर करतो तेव्हा सामान्यांना फक्त पोकळी दिसते. पण ज्ञात्यांना तिथे शिवपार्वतीचं दर्शन होतं असं म्हणतात. 

काहीजण म्हणतात की पोकळी म्हणजे काळ. आणि गाभाऱ्यावरचा पडदा म्हणजे मेंदूवरचं /आकलनक्षमतेवरचं मायेचं पटल. ते पटल बाजूला केलं की मग सत्याचं, शिवाचं, काळाचं आणि घटनांचं स्वरूप आपण जाणून घेऊ शकतो.

हेच आहे चिदंबर रहस्य.

आपल्या आकलनक्षमतेच्या मर्यादा आणि पूर्वग्रह बाजूला सारल्याशिवाय सत्याचे दर्शन होत नाही. त्यामुळे प्रत्येक वेळी आपल्याला होणारे सत्याचे दर्शन हे खरं तर आपल्याच आकलनक्षमतेचे द्योतक असते.

प्रत्येकाची आकलनक्षमता वेगवेगळी असते, त्यामुळे एकाच वेळी अनेकांनी गाभाऱ्यात पाहिले तरी त्या सर्वांना चिदंबराचे रहस्य वेगवेगळे दिसू शकते. त्याचप्रमाणे आपली आकलनक्षमता प्रत्येक वेळी बदलत असते त्यामुळे एकाच व्यक्तीने वेगवेगळ्या वेळी गाभाऱ्यात डोकावून पाहिले तर त्यालाही चिदंबराचे रहस्य प्रत्येक वेळी वेगवेगळ्या प्रकारे उलगडू शकते.

काल रात्री बातम्यांत ऐकलं की वढू बुद्रुक ग्रामस्थांनी तोडगा काढला. समाधी बांधणार म्हणून मान्य केलं. आणि बाहेरच्यांनी आमच्या सुटलेल्या वादात लक्ष घालू नये म्हणून आवाहन केलं. मग..

कोण जमा झाले?
का जमा झाले?
कुणी भाषण दिलं?
कोण भडकले?
कोणी दगडफेक केली?
कोण जखमी झाले?
कुणाच्या मालमत्तेची नासधूस झाली?
कुणाचा इतिहास बदलला?
कुणाचं भविष्य बदललं?
कुणाचा वर्तमान बदलला?
कुणाचं नेतृत्व पुढे आलं?
आणि हे सगळं का झालं?

चिदंबर रहस्य आहे.

जो ज्या दृष्टीने पडदा दूर करेल त्याला तसं दिसेल. कुणाला ब्राह्मण मराठा... कुणाला ब्राह्मण महार... कुणाला मराठा आणि महार.....कुणाला हिंदुत्ववादी आणि इतर.... कुणाला कॉंग्रेस राष्ट्रवादी आणि भाजपा... कुणाला पेशवाई आणि आधुनिकता... कुणाला पवार आणि फडणवीस.. कुणाला भाजप शिवसेना... तर कुणाला अजून काय... एकाच काळबिंदूवर एकवटलेल्या भिन्न घटना. प्रत्येकाची कारण परिणामाची साखळी वेगळी... पण एकाच काळबिंदूवर एकवटल्यामुळे कुठलीही घटना कुठल्याही घटनेला कारण परिणाम म्हणून जोडता येऊ शकते.

असते फक्त गाभाऱ्यातील पोकळी. आणि त्यात सतत पुढे जाणारा काळ.

गाभाऱ्यावरचा पडदा दूर केला की आपापल्या दृष्टीप्रमाणे पोकळीत आपापली उत्तरं दिसतात. चिदंबर रहस्य सगळ्यांना एकाच वेळी वेगवेगळ्या पध्दतीने उलगडतं.

2 comments: